Twa Corbies

Words: traditional Scottish; Child #26
Tune: "An Alarc'h" (The Swan); traditional Breton
Words and tune first united by Thurso Berwick.

 

As I was a-walkin all alane
I heard twa corbies makin a mane
And t'ane untae the t'ither did say, O
Whaur shall we gang and dine the day, O?
Whaur shall we gang and dine the day?

In behind yon auld fail dyke
I wat there lies a new-slain knight
And naebody kens that he lies there, O
But his hawk and his hound and his lady fair, O
His hawk and his hound and his lady fair

His hound is tae the huntin gaen
His hawk tae fetch the wild fowl hame
His Ladys taen anither mate, O
So we may mak our dinner swate, O
So we may mak our dinner swate

Ye'll sit on his white hause-bane
and I'll bike out his bonny blue een
Wi mony a lock o his gowden hair, O
We'll theek our nest when it grows bare, O
Theek our nest when it grows bare

Mony's the one for him lies slain
But nane shall ken whaur he has gaen:
Ower his white banes when they are bare, O
The wind shall blaw forever mair, O
The wind shall blaw forever mair.